Нашр қилинди: 01 июн, 2007 йил Ўзбекистон режими ва унинг Шанхай Ҳамкорлик ташкилоти (ШҲТ) бўйича шериклари – Россия, Хитой, Қозоғистон, Тожикистон ва Қирғизистон террорчилар ҳужумидан ташвишда. Террорчилар деганда, ҳар ким ҳар нимани тушунади. Масалан, Каримов режими учун унга қарши бош кўтарган ҳамма, Хитой учун уйғур озодлик курашчилари – террорчилар, демак. Айниқса, Каримов режими қирғийдан қўрққан қушдек эҳтимол тутилган “террорчилар ҳужуми”дан безовта. Ўзбекистон махсус хизматларига яқин манбанинг далолатига кўра, уларда Ваҳҳобийлар, Нурчилар, Ҳизбут-Таҳрир, Акромийлардан кейин яна Ўзбекистон Ислом ҳаракати ҳужумидан жонсараклик кузатилмоқда. Гап шундаки, ўша манбанинг ҳаракат таркибига “сингдирилган” ўз жосуслари хабарига асосланиб айтишича, сўнгги ойларда Покистоннинг Жанубий Вазиристон минтақасида бўлган жангларда Ислом ҳаракати янада чиниқиб, Афғонистон ҳудудига ўтган ва бу ерда ўз сафларини кенгайтираётган эмиш. Каримов режими эса эндиликда ана шу ҳаракат ҳужумини кутиб яшамоқда, унга қарши ўз тадорикларини кўрмоқда. 28-31 май кунлари Қирғизистоннинг Ўртатўқай сув омбори яқинидаги ҳарбий полигонда ШҲТга аъзо мамлакатларнинг махсус хизматлари, ички ишлар органлари ва бошқа куч ишлатар тизимлари “сарбозлари” томонидан “Исссиқкўл – Антитеррор – 2007” номи билан ўтказилган машқлар ҳам ўша тадорикларнинг биридир. Манба: «Эрк»
|